Kivu Beach Expo and Festival, iserukiramuco ririmo n’imurikagurisha, ritegurwa na Yirunga Ltd ku bufatanye n’Akarere ka Rutsiro, rizabera mu Murenge wa Boneza mu rwego rwo guteza imbere ubukerarugendo bushingiye ku muco muri aka karere. Kuri ubu imyiteguro irarimbanyije, harimo n’uruzinduko rwo gusura abafatanyabikorwa kugira ngo harebwe aho gahunda igeze.
Abafite ibikorwa by’ubukerarugendo mu nkengero z’ikiyaga cya Kivu, barimo Hon. Odette Nyiramirimo ufite Ruchel Hotel na mugenzi we ufite KaySun Hotel, bavuga ko iki gikorwa bacyakiriye neza kuko cyitezweho gukomeza kuzamura ubukerarugendo mu karere ka Rutsiro no kongera umubare w’abasura aka gace.
Abaturage bo mu kirwa cya Bugarura, kimwe mu bice byo mu Murenge wa Boneza bungukira cyane mu bukerarugendo, bavuga ko ibikorwa nk’ibi byatumye ikirwa cyabo kimenyekana kandi bikabafasha kwiyumva mu iterambere ry’akarere.
Muri iri murika gurisha harimo udushya tw’imikino, ubukerarugendo n’imyidagaduro.
Umuyobozi wa Yirunga Ltd, Bwana Yves Iyaremye, avuga ko iyi Kivu Beach Expo izaba yihariye kubera udushya twinshi tuyirimo, turimo:
- Umukino wo gukataza (Hiking) wa 20 km uzatangiza Expo, usorezwe kuri Palega Beach Inn
- Umukino umeze nka Badminton uzabera kuri KaySun Hotel
- Amarushanwa yo gutwara amato (Boat Racing)
- Amarushanwa yo koga
- Volley Beach izabera kuri Rushel Kivu Beach Resort ku wa 13 Ukuboza 2025
- Gusura inyambo zoga mu Kivu, umwihariko udasanzwe wo muri Boneza
- Gusura ikirwa cya Napoleon
- Ubukerarugendo bushingiye ku kawa muri Boneza Coffee
Aya marushanwa n’ibindi bikorwa azaha abatuye Boneza amahirwe yo kwigaragaza mu mikino itandukanye, anatume hataruka umubano hagati y’abasura n’abaturage.
Abayobozi b’akarere bashimangira ko ubukerarugendo bugiye kongera imbaraga
Umuyobozi w’Umurenge wa Boneza, Bwana Munyamahoro Muhizi Patrick, yavuze ko iri serukiramuco riteganyijwe mu mpera z’umwaka rizazamura izina rya Boneza mu bukerarugendo bushingiye ku muco, dore ko uyu murenge ufite ibyiza nyaburanga byinshi birimo ikiyaga cya Kivu, ibirwa birimo Bugarura na Napoleon, inyoni n’ibinyabuzima bitandukanye ndetse n’inka z’inyambo zizwi kuba i Nyanza ariko izo muri Boneza zikaba zifite umwihariko wo koga mu Kivu.
Umuyobozi w’Akarere ka Rutsiro, Madamu Kayitesi Dative, yavuze ko bitezwe ko iki gikorwa kizafasha mu kumenyekanisha Rutsiro nk’akarere gafite amahirwe menshi mu bukerarugendo no kugaragariza abashoramari ko ari ahantu heza ho gushora imari, gukora siporo no kuruhukira.
Iserukiramuco rizamara icyumweru, ririmo n’udushya twa mbere mu mateka ya Rutsiro
Ibirori bya Kivu Beach Expo and Festival 2025 biteganyijwe kuva ku wa 09 kugeza15 Ukuboza 2025, bikazabera mu busitani bunini bwa Palega Beach Inn, ahareba neza ikirwa cya Bugarura gituwe n’abaturage basaga 2,000.
Ku nshuro ya mbere mu mateka ya Rutsiro, hazabera Boat Party ku matariki ya 13 na14 Ukuboza 2025, aho abazitabira bazasusurutswa n’abahanzi n’abadije bakomeye, mu gihe abantu bari mu bwato barimo kuryoherwa n’ibyokurya n’ibinyobwa mu kiyaga hagati.
TCN | The Comments News | 🌊🎉 Kivu Beach Expo & Festival 2025